الاثنين، ٢٨ يوليو ٢٠٠٨
مين اللى غلطان
امبارح اتحكم على ممدوح اسماعيل بالبراءة فى حادثة غرق العبارة اللى مات فيها اكتر من ألف شخص وقالوا ان ده كان قتل خطأ طيب ممدوح اسماعيل مش غلطان طيب مين اللى غلطان ... طيب لو قبطان السفينة هو اللى غلطان مين اللى عينه... مين اللى سمح للعبارة تمشى فى البحر وهى ما فيهش ادوات انقاذ سليمة ... هل ممدوح اسماعيل مابيستغلش مركزة وهو عضو فى مجلس الشورى بالتعيين ... الحكم كان متوقع من ساعة ما حولوا القضية لجنحة بدل جناية ... هل فعلا كان حد متوقع انهم يسجنوا راجل من رجالتهم علشان 1033 مصرى ماتوا بسبب الاهمال والفساد ... انا شوفت اهالى الضحايا امبارح على قناة دريم بعد النطق بالحكم كانوا فى حالة صدمة وانهيار تام اكيد للظلم ده نهاية ... واكيد الليل الطويل اللى احنا فيه ده ليه أخر ... ربنا يصبرهم وينتقم من ممدوح اسماعيل وكل اللى زيه من الفسدين
الاشتراك في:
تعليقات الرسالة (Atom)
هناك ٥ تعليقات:
اللى غلطان الناس اللى بتركب العبارة
عشان حكومتنا السامية ورجالها المحترمين لا يمكن يكونوا غلطانين ابدا
بجد بوست محزن اوي
بيدو
السلام عليكم ورحمة الله وبركاته
بضم صوتى لصوتك وبقول معاكى ربنا ينتقم من كل الظالمين
قولى امين
ياسمين اول زيارة ليه لمدونتك البوست جميل انك اهتميتى بمشاعر اكتر ن الف اسره حاسين ان اولادهم لسه ما يتين النهارده
جزاكى الله كل خير عزيزتى على هذا البوست
وفى انتظار القادم
ودومتى باطيب حال
والسلام عليكم ورحة الله وبركاته
عليكم السلام يا مؤمنة
بأذن الله ماتكونش الزيارة الاخيرة
ونورتى المدونة
السلام عليكم
ازيك ياسمين
انا اقولك مين اللى غلطان
الغلطان ان مفيش حد غلط
ممدوح اسماعيل عاوز يقولنا انه كتر الف خيره اوى انه بينقل الشعب الغلبان فى عبارات يدوبك هى ديه اللى تليق بيه ومينفعش له حاجة غير كده
الشعب اصله حقير وميستاهلش اى حاجة حلوة
والشعب مش غلطان لانه كان فاهم غلط
كان فاهم ان البنى آدمين المفروض يحترموهم ويعاملوهم معاملة البنى ادمين اللى فى بلد الغرب
يعنى كل واحد وعلى قد فهمه
الحكومة بقي الحكومة الغلبانة مش غلطانة خااااالص ليه بقي؟؟
لان هى برضه فاهمة ان الشعب ده آخره يضرب على دماغه والصح انه مينطقش ولو نطق يبقي خرق القوانين
ربنا يستر عليا واطلع اناالغلطانة فى الاخر
D:
معلش ياجميل طولت عليكى
تحياتى ليكى
ازيك يارضوى
المشكلة ان فى ناس تطلع تقولك ما فيش تعليق على احكام القضاء ... ليه هما القضاه دول مش بشر ممكن يأخدوا رشوة او يصدروا حكم علشان ترقية
فى الزمان ده البنى ادم المصرى بقى تمنة رخيص اوى
مرسيه على تعليقك
إرسال تعليق